Қалб

qalbМуқаддас маскан бор қалбнинг тўрида –

Кавсарга ишора, равзага нишон.

Тангри тажаллиси қатра нурида,

Зиёга талпиниб яшайди инсон.

 

Ҳар қачон саховат айласа қай зот,

Бир қадам ташлайди ўша маъвога.

Кўнглини ҳасаддан этолса озод,

Яқинлашиб борар буюк самога.

 

Дўстининг айбини кечирса дарров,

Гина, кин сақламай жисму жонида.

Ғийбатга гунг бўлса, туҳматга соқов,

Сўзи равон келар Тангри ёнида.

 

Муҳтожга қўл тутса, ташналарга сув,

Манзилга дамодам кетиб боради.

Рост сўзни айтарда билмаса қўрқув,

Аналҳақ бахтига етиб боради.

 

Дуогўй чолларнинг насиҳатидек

Бу гаплар шунчаки айтишга осон.

Кўпга насиб этмас ижобати лек,

Ҳамма йўл бошида шайтон бор, шайтон.

 

Унинг ҳийлалари – ишрат, сийму зар,

Бандага мангу бахт ато этгудай.

Кўксида заррача нафси бўлса гар,

Ҳатто фаришталар оғиб кетгудай.

 

…Такрор чорлайверар равзаи ризвон,

Висоли энг олий саодат демак.

Қалбининг тўрига етолса инсон,

Бу дунё жаннатга айланар бешак!

 

 Азизбек АНВАР

Мақола 988 марта ўқилган

1 Комментарий для Қалб

  1. Qalbim bu hayotimga qanchalar lanatlar yogdirmasin undanam ortiqroq shukurona aytajak bu mening qalbim.

Комментировать

Ваш электронный адрес не будет опубликован.


*